Anne Bitsch

Anne Bitsch (f. 1978, Danmark) er ein norsk-dansk forskar og forfattar med doktorgrad i samfunnsgeografi. I skriving og forsking tar ho mellom anna føre seg høgreekstremisme, menneskerettar, kjønnsproblematikk og seksuell vald. I 2017 fekk ho Kritikerprisen for boka Går du nå, er du ikke lenger min datter, der ho skriv om omsorgssvikt.

I 2021 er ho aktuell med boka Brorskapet om drapet på 15-år gamle Benjamin Hermansen i 2001. Her rettar ho søkelyset mot radikaliseringa og den militante nasjonalismen som låg til grunn for hendinga, men også mot ei ufullstendig etterforsking og sviktande oppfølging av rasistisk vald i Noreg.