NM-finale i slam

LitFestBergen er offisiell arrangør av NM-finalen i slampoesi. I løpet av hausten og vinteren har det blitt arrangert delfinalar landet rundt, og 10. februar samlast finalistane frå Trondheim, Bergen, Oslo og Innlandet for tredje gong på Litteraturhuset i Bergen for å kjempe om den gjeve pokalen. Programleiar, forfattar og musikar Heidi Marie Vestrheim er konferansier.

Slampoesi er ei direkte og spontan poesioppleving som ligg i kryssingspunktet mellom diktopplesing, spoken word, standup og rapp. Den første slamopplesinga blei arrangert på ein jazzklubb i Chicago i 1984 av bygningsarbeidaren og poeten Marc Smith, som hadde eit ønske om å gjere poesien meir folkeleg og inkluderande. Kontakt med publikum, stemning og temperatur i rommet er alfa og omega, og framføringa tel like mykje som teksten.