Gunnhild Øyehaug

Gunnhild Øyehaug (f. 1975, Noreg) er forfattar og lærar ved Skrivekunstakademiet i Hordaland. Ho har tidlegare vore medredaktør i tidsskrifta Kraftsentrum og Vagant og litteraturkritikar i Morgenbladet og Klassekampen.

Øyehaug har skrive manus til ein langfilm og ein kortfilm, og bøkene hennar er blant anna utgitt i Danmark, Sverige og Tyskland. I 2017 kom novellesamlinga Knutar +  ut i USA, og i 2018 blei romanen Vente, blinke gitt ut i same land. Vente, blinke blei i 2018 nominert til den amerikanske litteraturprisen National Book Award.

Gunnhild Øyehaug fekk Bjørnsonstipendet i 2006, Doblougprisen i 2009 og Sultprisen i 2009.

Siste utgiving er novellesamlinga Vonde blomar frå 2020, som har fått svært gode kritikkar.