Marija Bliznac blei noregsmeister i slampoesi

Marija Bliznak, som representerte Innland, er ny noregsmeister i slam. I konkurransen, som blei arrangert på LitFestBergen laurdag 11. februar, vann ho 10 000 kroner, og skal representere Noreg i verdsmeisterskapen, som blir arrangert i Paris.

Marija Bliznac er opphaveleg frå Bosnia & Hercegovina, og har budd i Noreg sidan 2014. Ho bur i Porsgrunn og jobbar som produsent på Grenland friteater. Ho har ein bachelor i engelsk språk og litteratur frå Bosnia. Ho har gått på forfattarstudiet i Bø og har ein master i kulturstudiar frå same stad. Marija vaks opp med rap og hip hop, og det er der kjærleiken til slampoesi kjem frå.

Finalistane i 2023 var:

André Berge Frislid (midt-Norge)

Jawad Aziz (Oslo)

Marija Bliznac (Innland)

Sara Harbo Soma (Vestland)

Programleiarar var Asha Abdullahi og Ida Benonisen.

I 2022 tok LitFestBergen over stafettpinnen frå Foreningen !les og er no offisiell arrangør av NM-finalen i slampoesi. I løpet av året blir det arrangert delfinalar landet rundt, og på LitFestBergen samlast finalistane for å kjempe om den gjeve pokalen. 

Slampoesi er ei direkte og spontan poesioppleving som ligg i kryssingspunktet mellom diktopplesing, spoken word, standup og rapp. Den første slamopplesinga blei arrangert på ein jazzklubb i Chicago i 1984 av bygningsarbeidaren og poeten Marc Smith, som hadde eit ønske om å gjere poesien meir folkeleg og inkluderande. Kontakt med publikum, stemning og temperatur i rommet er alfa og omega. Framføringa tel like mykje som teksten, og det er publikum som kårar vinnaren.