1994: Eit kjærleiksdikt

Eg vil ha nokon som vil sjå på meg

og elske meg

slik dei kvite ser på

og elskar

Mandela.

Nokon som vil halde fast i minnet om meg

Slik dei kvite held fast i arven etter Mandela.

Ein kjærast som vil bygge Robben Island bak huset

og få meg til å tru at eg har ein hage

og frisk luft, ein regnboge og fridom.

Ein sanningskommisjonskjærast

Du forstår ikkje kjærleik

før du er blitt elska som Mandela.

Du forstår ikkje svik

før du er blitt elska som Mandela.

Du forstår ikkje faenskap

før du er blitt elska som Mandela. 

Du forstår ikkje skitsnakk

før du er blitt elska som Mandela.

Og dette er ein av dei mange restane frå slaveriet:

å vere elska som Mandela.

Koleka Putuma

(Omsett frå engelsk av Njord V. Svendsen)